Ҙур һыу килә!

Республиканың Ғәҙәттән тыш хәлдәр буйынса дәүләт комитеты рәйесенең беренсе урынбаҫары Кирилл Первов хәбәр итеүенсә, был аҙнала Өфөлә ташҡындың юғары нөктәһе көтөлә.

Башҡортостан биләмәһендә ташҡынға бәйле хәл-торош буйынса уҙған бөгөнгө онлайн-брифингта хәбәр итеүҙәренсә, 19 апрелдә иртәнге сәғәт 8-гә ҡарай биш муниципалитетта 15 хәл күҙәтеү аҫтында ҡала. Һөҙөмтәлә 481 ихатаны, баҡсаларҙа 464 участканы, 28 баҡса йортон һыу баҫҡан. Бер тәүлектә Козарез районында 102 баҡса йорто һыуҙа ҡалған, “был көтөлгән хәл” тип хәбәр итә Ғәҙәттән тыш хәлдәр министрлығының Башҡортостан буйынса баш идаралығының беренсе урынбаҫары Эдуард Идрисов.

“Республиканың тәбиғәттән файҙаланыу һәм экология министры урынбаҫары Илдар Ғарифуллин белдереүенсә, ташҡын экологияға ыңғай йоғонто яһай, – тип билдәләне ул.Беҙ бөтә йылғаларҙың үҙәнен таҙарта алмайбыҙ. Ташҡын биосфераға ла йоғоното яһай, сөнки йылға таша һәм тәбиғәткә кәрәкле ыуылдырыҡ сәсеү һәм башҡа күренештәр башлана. Ташҡын әкрен генә беҙҙең экологияға файҙа килтерә”.

Гидрометеорология һәм тирә-яҡ мөхитте күҙәтеү буйынса республика идаралығы начальнигы Вилора Горохольская белдереүенсә, дала йылғалары тынысланһа, тау йылғаларында һыу артыуы дауам итә. Ҡариҙел йылғаһының үрендә һыу 10 сантиметрға тиклем күтәрелгән. Ағиҙел йылғаһы кимәле 629 сантиметр тәшкил итә. Павловка һыуһаҡлағысында һыуҙы асыу дауам итә. Уның тулҡыны бер-ике көндә Өфөгә килеп етәсәк, шуға ла алдағы көндәрҙә Ағиҙел йылғаһында һыу ҡалҡасаҡ. Уның иң юғары нөктәһе 650–680 сантиметрға етер тип көтөлә. “Көн һайын яҡынса 10-15 сантиметрға һыу ҡалҡа бара. Ошо тенденция әле үҙгәрешһеҙ һаҡлана”, – ти Вилора Горохольская.

Шулай итеп, Өфөлә ҙур һыу 21 апрелдә көтөлә. Әйткәндәй, аҙна аҙағында ямғырҙар яуасаҡ, һәм һыу ташыу хәүефе һаҡлана әле.

Брифингты Башҡортостан Башлығының социаль коммуникациялар буйынса идаралығы начальнигы Елена Прочаковская алып барҙы.