Опера йырсыһы Әлфиә Кәримова тыуған төйәгенә ҡайтҡан һәм һайлауҙа ҡатнаша

Күренекле опера йырсыһы Әлфиә Кәримова Ҡаҙағстандан тыуған төйәгенә ҡайтҡан һәм Рәсәй Федерацияһы Президентын һайлауҙа ҡатнаша. Хәтерегеҙгә төшөрәбеҙ, бына инде биш йыл дауамында Башҡортостандың атҡаҙанған артисы «Астана-опера» театры солисы булып эшләй.

Йырсы әсәһе һәм улы менән бергә тыуған 91-се гимназияһына тауыш бирергә юлланды.

«Һайлауҙарға һәр саҡ йөрөйөм, мөмкинлегем булһа, үҙемдең гражданлыҡ ҡарашымды әүҙем күрһәтәм. Бына бөгөн дә бик мөһим көн – Рәсәй Президентын һайлау, тыуған Өфөмдә булып, үҙ кандидатым өсөн тауыш биреүҙе ҙур бурыс тип иҫәпләйем, — ти Әлфиә Кәримова. — Бөтә ғаиләбеҙ менән һайлау участкаһына юлландыҡ. Ғәҙәттәгесә ул бына инде күп йылдар дауамында мин 20 йыл элек тамамлаған Өфө гимназияһында урынлашҡан. Тыуған диуарҙарҙа булыу ҡыуаныслы һәм тулҡынландырғыс».