Сәнғәт мәктәбендә 2-се ҡала мәктәбенең һигеҙенсе класс уҡыусыһы Дарья Тимофееваның күргәҙмәһе асылды. Уның 55 картинаһының һәр береһенең үҙ тарихы бар. Уның иң яратҡан картинаһы – йәнһүрәт геройы, Һыу аждаһаһы Сису.
Дарьяның ҡара буяуҙар менән эшләнгән бер генә эше лә юҡ. Хатта йәш рәссамдың көҙгө пейзаждары ла сағыу һары, ҡыҙыл, ҡыҙғылт – һары төҫтәр менән һоҡландыра.
Ҡыҙ «умыртҡа мускул атрофияһы» диагнозы менән тыуа, өйҙә уҡый. Әммә уның дуҫтары күп.
- Беҙ Дашаны сәнғәт мәктәбенән беләбеҙ. Һәм һәр ваҡыт уның картиналарында шул тиклем изгелек һәм позитивтың ҡайҙан килеүенә ғәжәпләнәбеҙ! Уның бөтә ғүмерен инвалид коляскаһында үткәргәненә ышаныуы ҡыйын. Беҙ барыбыҙ ҙа унан тормошто яратырға өйрәнәбеҙ, - ти Әмирә Хәзиева һәм Раделина Хәйернасова.
Даша 7 йәштә һүрәт төшөрөү менән ҡыҙыҡһына башлай. Ул «Алһыу фил» студияһында шөғөлләнә. Педагог Зилә Васильева ҡыҙҙың талантын күрә ала. Бының өсөн Тимофеевтар ғаиләһе уға бик рәхмәтле. Хәҙер Дарья сәнғәт мәктәбендә педагог Эльза Нуриевала уҡый. Һәләтле бала булараҡ, ҡыҙ «Создание» хәйриә фондынан стипендия ала.
Даша һүрәт төшөрөүҙә генә уңышҡа өлгәшмәй. Ул «Унисон» вокаль студияһында йырлай һәм бер нисә тапҡыр сәхнәлә сығыш яһаны да инде. Ул мәктәптә лә яҡшы уҡый. Ҡыҙ график дизайнер булырға хыяллана. Ә әлегә дуҫтары һәм ике туған ағалары һәм апалары өсөн һүрәт төшөрөү буйынса оҫталыҡ дәрестәре үткәрә.