Туймазы театры Рәсәй Театр эшмәкәрҙәре союзы конкурсында еңде

Рәсәй Театр эшмәкәрҙәре союзы «Рәсәй төбәктәре театрҙарына тәнҡитселәр командировкаһы» программаһында ҡатнашыуға конкурсҡа йомғаҡ яһаны. Илдең 36 театры еңеүсе булды. Уларҙың береһе - Туймазы дәүләт татар драма театры. Жюри хөкөмөнә туймазылар «Тау аҫтында тал илай», «Әлдермеш ауылынан ҡарт», «Ул үлгән саҡта», «Һөйөклө Елена Сергеевна» һәм «Бәләкәй шаһзат» спектаклдәрен тәҡдим итә. Профессиональ тәнҡитселәр спектаклдәр ҡараясаҡ һәм репертуар буйынса фекер алышасаҡ.

Театр директоры Руслан Вәхитов Туймазыға «Заманса драматургия» журналының редакция советы ағзаһы, «Вахтанговец» гәзитенең баш мөхәррире Валентина Федорова киләсәге хаҡында хәбәр итте. Ул апрель уртаһында килеүе көтөлә. Конкурс еңеүселәре иҫәбендә Башҡортостандың тағы ла ике мәҙәниәт учреждениеһы - БР Милли театры һәм Өфө йәш тамашасы театры бар.