Ҡоймаҡ байрамы йәнле һәм йылы үтте

Үткән аҙнала Туймазы районының Ильсембәт ауылы янындағы Тобаҡүл күлендә «Ҡоймаҡ байрамы» исемле фольклор сараһы ойошторолдо. Көндөң болотло булыуына, өҫтәүенә, ваҡ ҡына ямғыр һибәләүенә ҡарамаҫтан, халыҡ күл буйындағы яландарға күпләп йыйылды. Сөнки байрамда ҡайнар, яңы бешкән ҡоймаҡтарҙан ауыҙ итергә мөмкин ине. Уларҙы шунда уҡ электр плиткаһында ауылдаштары Регина Заһиҙуллина менән Рәмзия Исхаҡова бешерҙе. Ике хужабикәнең дә үҙенә генә хас ысулы булғанға күрә, ҡоймаҡтарҙың төҫө һәм ҡиәфәте лә бер аҙ айырылып торҙо. Әммә уларҙың барыһы ла тәрилкәләрҙән бик тиҙ юҡ булды — сөнки тәмле ине.

- Мин ике литр йылы һөткә 11 грамм ҡоро сүпрә, 1,8 килограмм он һәм дүрт йомортҡа ҡуштым. Һуңынан әҙерәк тоҙ менән шәкәр өҫтәп, ҡамырҙың күтәрелгәнен көттөм дә бешерә башланым, — тип үҙ рецепты менән уртаҡлашты Заһиҙуллина.

- Минең ҡоймаҡтарҙа ауыл һөтө, манный ярмаһы, иләнгән он һәм брикеттағы сүпрә ҡулланыла. Ярманы мотлаҡ ҡайнар һөткә һалырға кәрәк, шунан ғына он өҫтәлә. Артабан тоҙ менән шәкәр ҡушам, — тип үҙенең серле рецептын һөйләне Исхаҡова.

Ике хужабикә лә был рецепттарҙы әсәләренән өйрәнгән һәм хәҙер уларҙы ауылдаштары менән уртаҡлаша алыуға ҡыуана.

Был көндө ҡунаҡтарҙы ҡоймаҡ менән генә һыйламанылар -  ҡаҙанда бешкән бер нисә төрлө ярманан әҙерләнгән бутҡа ла бар ине. Был ризыҡты усаҡ өҫтөндә Рәзиҙә Ғәлиәмова бешергән.

Шул ваҡыт импровизацияланған сәхнәлә ауыл халҡы яратҡан йырҙар яңғыраны. Рәмил Султыев, Виталий Петров, Карина Хәкимова, Сафина Вәлиева һәм Дамир Хәйбрахманов йырҙар башҡарҙы. Ә мәктәп ҡыҙҙары дәртле татар бейеүе менән сығыш яһаны. Уларҙы Ильсембәт мәҙәниәт йорто менеджеры Зөлфиә Хисмәтуллина әҙерләгән.

Байрам ҡунаҡтары Танзилә Шакирова менән Канзия Хәлиуллина ҡоймаҡ байрамының тарихы хаҡында һөйләп үтте: борон ата-бабалар уны нисек үткәргән, ни өсөн өҫтәлдә төп ризыҡ булып ҡоймаҡ торған, һәм үҙҙәре иртән бешереп алып килгән ҡоймаҡтарҙы ла татып ҡарарға саҡырҙы.

Ильчимбәт ауыл советы башлығы Рим Ғиниятуллин ауылдың йәмәғәт тормошонда әүҙем ҡатнашҡан кешеләргә муниципаль берәмек хакимиәтенең Рәхмәт хаттарын тапшырҙы.

Артабан байрам күңелле уйындар һәм ярыштар менән дауам итте: туп менән йүгереү, тоҡ кейеп йүгереү, күҙ бәйләп һауыт ватыу, ҡоймаҡ йыйыу, арҡан тартышыу кеүек ярыштар ойошторолдо.