Туймазыла үҙешмәкәр ҡурайсыларҙың асыҡ конкурсы үтә

Бөгөн Туймазыла VI «Тылсымлы ҡурай моңо» үҙешмәкәр ҡурайсыларҙың асыҡ конкурсы үтә. Унда Башҡортостандың 12 районынан һәм ҡалаһынан талантлы музыканттар ҡатнаша - ете ансамбль һәм 27 солист.

Туймазы районынан алты музыкант ҡатнаша. Иң йәш музыкантҡа һигеҙ йәш, икенсе класс уҡыусыһы Әмир Ғәбиҙуллин конкурсҡа Өфө районынан килде. Иң өлкән конкурсантҡа – 63 йәш. Самат Усманов Әлшәй районынан.

Иң күп сығыш яһаусылар - 16 йәшкә тиклемгеләр.

Музыкаль бәйге еңеүселәренең Гала-концерты 18 сәғәттә «Родина»мәҙәниәт һарайында башланасаҡ.

Халыҡ уйын ҡоралының тылсымлы көйҙәрен теләгән һәр кем тыңлай ала. «Тылсымлы ҡурай моңо» конкурсы ике йылға бер тапҡыр уҙғарыла, ә тәүге тапҡыр 2015 йылда ойошторолдо.

Ҙур музыкаль оҫталыҡ конкурстары сиктәрендә йәш таланттарҙы асыу Рәсәй президенты Владимир Путин инициативаһы буйынса тормошҡа ашырылған «Йәштәр һәм балалар» милли проектының маҡсаттарына өлгәшеүгә булышлыҡ итә.