Туймазынан уҡытыусы Басковта йырланы

Мәскәүҙә БөРә рәсәй класс етәкселәре форумы үтте. Ул бөтә илдән 1000-дән ашыу педагогты йыйҙы. Унда Рәсәй педагогтары ғына түгел, Абхазия, Көньяҡ Осетия, Ҡаҙағстан, Үзбәкстан уҡытыусылары ла бар ине.

Башҡортостандан форумға 20 уҡытыусы юлланды. Улар араһында тәрбиә буйынса советник, Серафимовка ауылының 1-се мәктәбенең музыка уҡытыусыһы Юлиә Сәйфуллина ла бар ине. Ә 4-се кластар уҡытыусылары Лилиә Сираева һәм Роза Низаева форумдың ирекмәндәре булды, Юлия Радиковна шулай уҡ «Иртәнге почта» телетапшырыуында ҡатнашты. Тапшырыу класс етәкселәре форумының белем биреү программаһының бер өлөшө булды.Лекторҙар булып мәҙәниәт һәм сәнғәт, фән, спорт һәм башҡа өлкәләрҙең билдәле эшмәкәрҙәре сығыш яһаны. Быйыл саҡырылған йондоҙҙар иҫәбендә Андрей Малахов, Николай Басков, Владимир Соловьев, Эрнест Мацкявичус, Мария Ситтель, Юлия Барановская булды.

- Мин күптән класс етәкселәре форумына эләгергә теләнем, шуға күрә йыл һайын ҡатнашыуға ғариза ебәрҙем. Һәм килеп сыҡты, - тип уртаҡлашты Юлия Радиковна. - Һайлап алыу шарттары буйынса минең социаль селтәрҙәге битем ойоштороу комитеты өсөн асыҡ булырға тейеш ине. Унда мин төрлө йырҙар башҡарған видеояҙмалар урынлаштырҙым. Әммә форумға бер аҙна ҡалғас, ойоштороусылар миңә шылтыратып, «Иртәнге почта» телетапшырыуының байрам сығарылышында сығыш яһау өсөн мине һайлап алыуҙары тураһында хәбәр итеүҙәре көтөлмәгән хәл булды. Миңә Юрий Антоновтың «Мечта сбывается» йырын башҡарырға тәҡдим иттеләр. Әммә бер нисә репетициянан һуң мин был йырҙың бөтә илгә башҡарырға теләгән йыр түгеллеген аңланым. Ул минең вокаль мөмкинлектәремде асып бирмәй. Ойоштороусылар репетициянан видеояҙманы тыңланы һәм ризалашты. «Город 312» төркөмөнөң «Останусь» йырына туҡталырға ҡарар итәләр. Мин уны бер нисә көн эсендә өйрәндем. Сығыш алдынан сәхнәлә бер генә репетиция булды.

 - Туймазынан Юлиә Сәйфуллинаны ҡаршы алығыҙ! - программаны алып барыусы Николай Басков уның сәхнәгә сығыуын иғлан итә. - Сәхнә буйлап тәүге аҙымдар яһағанда, тулҡынланыуҙан ҡалтырандым. Ә һуңынан тамашасыларҙың йырҙы иғтибар менән тыңлауын күреп, тынысландым, - ти  педагог.

Юлия Радиковна мәктәптә 2017 йылдан эшләй. Әммә уның ижади һәм профессиональ тупланмаһында байтаҡ ҡаҙаныштар бар. Өс йыл элек Юлиә Радикова «Йыл уҡытыусыһы» район конкурсында еңеүсе булды. Бынан алдараҡ ул «Поле чудес» телешоуында була, унда билдәле телевидение алып барыусыһы Леонид Якубович һәм бөтә ил алдында «В горнице моей светло» йырын йырлай.