Рәмзин Әбсәләмов "Сәләм»дә ҡунаҡта булды

Конкурс ике йылға бер тапҡыр үткәрелә.

Башҡортостандың атҡаҙанған мәҙәниәт хеҙмәткәре, Туймазы районының мәҙәниәт бүлеге начальнигы Рәмзин Әбсәләмов Башҡортостан юлдаш телевидениеһының «Сәләм» программаһында ҡунаҡта булды. Ул алып барыусыларға Туймазыла 1996 йылдан алып уҙғарылған Сәхи Хисмәтуллин исемендәге «Озон кой» конкурсы хаҡында һөйләне.

Рәмзин Әбсәләмов һүҙҙәренсә, быйылдан конкурс Башҡортостандың атҡаҙанған мәҙәниәт хеҙмәткәре Сәхи Хисмәтуллин исемен йөрөтә, уның инициативаһы буйынса «Оҙон көй» конкурсы ойошторолдо. Исемдәге үҙгәрештәргә ҡарамаҫтан, конкурс шарттары элекке кеүек ҡала. Ҡатнашыусыларға ике йыр башҡарырға кәрәк – береһе – а капелла, икенсеһе-ҡурай йәки баян аккомпанементы аҫтында.

Еңеүселәрҙе өс номинацияла һайлайҙар: 16 йәшкә тиклемге, 60 йәшкә тиклемге, 60 йәштән өлкәндәр. Конкурс ике көн – 7 һәм 8 ноябрҙә үтәсәк. Конкурста ҡатнашыуға ғаризаны 1 ноябргә тиклем бирергә мөмкин.

6+