Һуңғы ваҡытта ауыл мәҙәниәт йорттарында һәм клубтарында ҡул эштәре менән мауығыусылар һаны артты. Шуныһы иғтибарға лайыҡ: клуб хеҙмәткәрҙәре үҙҙәре лә даими эҙләнеүҙә: биҙәү-ҡулланма ижадын әүҙем өйрәнә, ҡыҙыҡлы йүнәлештәр таба һәм был эшкә клубтарға килеүселәрҙе лә йәлеп итә.
Практикум сиктәрендә Дуҫлыҡ ауылы мәҙәниәт йорто ойоштороусыһы Әлфирә Ситдиҡова башҡорт ҡатын-ҡыҙҙары түшелдеректәрен эшләү хаҡында һөйләне, ә Туймазы районының башҡорт тарихи-мәҙәни үҙәгенең баш белгесе Гөлмирә Бикбулатова туҡыма эшләү тәжрибәһе менән уртаҡлашты.
Семинар-практикумдың төп темаһы - Туймазы районының сигелгән картаһы. Ошо көндәрҙә Әлфирә Шәрифйән ҡыҙы "Сигелгән Башҡортостан" республика фестиваленә әҙерлек сиктәрендә Туймазы районының картаһын сигеү эшен тамамланы.