Туймазыла банк хеҙмәткәрҙәре клиенттарҙы аферистарҙан ҡотҡарған

Йыл башынан алып мутлашыусылар туймазылыларҙан 20 миллион һумдан ашыу аҡса тартып алған. 323 енәйәт эше асылған. Был уҙған йылдың ошо уҡ осорона ҡарағанда ике тапҡырға күберәк. Әгәр клиенттарға аферистарҙы танырға ярҙам иткән банк хеҙмәткәрҙәре уяу булмаһа, енәйәттәр тағы ла күберәк булыр ине.

ВТБ банкының «Туймазы» операция офисы белгестәре - Әлмира Сафина, Регина Ғиззәтуллина, Фәнүзә Хисмәтуллина һәм директор Эльвира Шәйхетдинова Рәсәй Эске эштәр министрлығының Туймазы районы буйынса бүлегенең һәм Эске эштәр министрлығы ҡарамағындағы Йәмәғәт советының әүҙем гражданлыҡ позицияһы һәм полиция хеҙмәткәрҙәренә булышлыҡ иткәне өсөн Рәхмәт хаттары менән бүләкләнде. Апрелдә ВТБ банкы офисына кредит һорап 70 йәшлек ҡатын мөрәжәғәт иткән. Аҡса уға фатирҙы ремонтлау өсөн кәрәклеген әйтте. Асыҡланыуынса, элек ул бер ҡасан да кредит алмаған, хәҙер уға 300 мең һум кәрәк булған.

- Әгәр кеше кредит алырға ҡарар итһә, уны яйлап түләй алһа, беҙ унан баш тартырға тейеш түгел, - ти Регина Ғиззәтуллина. - Әммә өлкән йәштәге ҡатындың, ҙур булмаған пенсияһына ҡарамаҫтан, ошондай ҙур кредит алырға ҡарар итеүе шикле тойолдо. Ул аҡсаны дауаланыуға йәки торлаҡ шарттарын яҡшыртыуға түгел, ә ремонтҡа ала. Уға һорауҙар бирә башланым: ни өсөн яҡын туғандары кредит алмай? Әгәр пенсияның бер өлөшө - кредитҡа, икенсе өлөшө коммуналь хеҙмәттәргә китһә, ул нимәгә йәшәргә йыйына? Аферистарҙың мутлыҡтары тураһында һөйләнем һәм уға мутлашыу осраҡтары тураһында иҫтәлек уҡырға бирҙем. Ләкин клиент сит кешеләрҙең ҡатнашлығын кире ҡаҡты һәм быны үҙенең шәхси ҡарары тип раҫланы. Тағы бер факт аптыратты - ҡатын, кредит юллағанда страховка өсөн яҡынса 40 мең һум түләргә тейешлеген белгәс, займдың суммаһын ҡыҫҡартыуҙарын һораны.

Кредит документтары әҙер булғас, ҡатындың телефоны шылтыраны. Абонент менән һөйләшеүенән аңланым, уға мутлашыусылар шылтырата. Клиентҡа офис директоры Эльвира Шәйхетдинованың кабинетына инергә ҡуштым. Унда, ниһайәт, пенсионер ҡатынға, аферистар унан аҡса алып, банк алдындағы бурыстарын тағып ҡуйырға маташа, тип аңлата алдыҡ. Аптырағас, ул, быны аңлап, илап ебәрҙе. Уның ризалығы менән кредитты ваҡытынан алда ҡапларға булдыҡ. Страховкалау өсөн аҡсаны ла кире ҡайтарҙыҡ (ул ваҡытта быны эшләргә мөмкин ине). Шуға күрә ҡатын бер тин дә юғалтманы.

- Рәсәй Эске эштәр министрлығының Туймазы районы буйынса бүлексәһендә - алданған кешеләрҙән тиҫтәләрсә ғариза, - ти Эске эштәр министрлығының эске эштәр бүлеге начальнигы урынбаҫары Тимур Сәйетгәрәев. - Кешеләр көс түгеп йыйылған аҡсаны мутлашыусыларға күсерә, бурыҡа бата. Әгәр шылтыратыусылар банк, полиция, Федераль именлек хеҙмәте хеҙмәткәрҙәре булып таныштырһа, халыҡты һаҡ булырға саҡырам. Ышанмағыҙ! Иғлан ителгән банктың офисына мөрәжәғәт итегеҙ йәки ҡыҙыу линияға (телефон картаның артҡы өлөшөндә күрһәтелгән) шылтыратығыҙ, беҙҙең бүлеккә килегеҙ. Шуны хәтерегеҙҙә тотоғоҙ: банк хеҙмәткәрҙәре һәм хоҡуҡ һаҡлау органдары хеҙмәткәрҙәре бер ҡасан да мессенджерҙарҙан шылтыратмай, граждандарҙан аҡса күсереүҙе йәки кредит юллауҙы, милекте һатыуҙы, аҡсаны сит кешеләргә тапшырыуҙы һорамай.