Ҡышҡы каникулдарҙың даталары билдәле булды

Һуңғы ваҡытта киң мәғлүмәт сараларында һәм интернетта уҡыусыларҙың ҡышҡы каникулдары тураһында төрлө мәғлүмәт баҫылып сыҡты. Башҡортостандың Мәғариф министрлығында, ниһайәт, был мәсьәләгә асыҡлыҡ индерҙеләр.

«1-11-се класс уҡыусылары өсөн ҡышҡы каникулдар 2025 йылдың 31 декабренән 2026 йылдың 11 ғинуарына тиклем дауам итә. Балалар ял итеп һәм яңы көс туплап, дүшәмбе, 12 ғинуарҙа, йәнә парта артына ултыра», — тине Башҡортостандың мәғариф министры Илдар Мәүлитбирҙин.

Ул шулай уҡ ата-әсәләргә был осорҙа балаларҙың хәүефһеҙлегенә етди иғтибар бүлеүҙәрен һорап мөрәжәғәт итте. Ә уҡыусыларға был көндәрҙе файҙалы итеп үткәрергә: саф һауала күберәк йөрөргә, ҡыҙыҡлы китаптар уҡырға, ғаилә менән ваҡыт үткәрергә һәм мәҙәни сараларға йөрөргә кәңәш бирҙе.