Ун биш бала әсәһе һәм уңышлы етәксе

Зөлфиә бәләкәйҙән үк ижад менән, бигрәк тә рәсем төшөрөү менән мауыға. Тәбиғи таланты менән нығытылған был дәрт уның тормош юлын билдәләй. Хәйер, рәссам була алыр ине, уның ысын бурысы башҡала – белемдәре менән уртаҡлашыу һәм башҡаларҙы илһамландырыу мөмкинлегендә. Шулай итеп, ул педагог юлын һайлаған.

Тыуған ауылы Исламбахты мәктәбендә һигеҙенсе класты тамамлағас, Зөлфиә үҙен рәсем сәнғәтен уҡытыуға бағышларға ҡарар итә. Был маҡсатҡа юл Өфөнөң 2-се педагогия училищеһына уҡырға инеүҙән башлана. 1990 йылда ул үҙенең белемен Башҡорт дәүләт педагогия институтының сәнғәт-график факультетында ситтән тороп уҡып дауам итә.

Зөлфиә Фәнис ҡыҙының хеҙмәт эшсәнлеге 1990 йылдың августында башлана. Ул Исламбахты тулы булмаған урта мәктәбендә рәсем һәм черчение фәндәрен уҡыта башлай. Тап бына шунда, 1999 йылда, ул тыуған яҡты өйрәнеү музейын булдырыу инициаторы була, ул уҡыусылар өсөн тарихты сағылдырған үҙәккә әүерелә. Инде 15 йыл Зөлфиә Ғиләжева “Декоратив-ғәмәли сәнғәт” түгәрәген алып бара, һәр балаға үҙенең ижади потенциалын ыһәм юғары һөҙөмтәләргә ирешергә ярҙам итә.

Уның педагогик девизы – “Ижад ит, уйлап тап, эшләп ҡара”. Ул уҡытыусының шәхси өлгөһө уҡыусының шәхесен формалаштырыуҙа төп роль уйнай тип ышана. Уның һөнәри ҡаҙаныштары ҙур: майлы буяу рәсем сәнғәте өсөн Башҡортостан Республикаһы Мәғариф министрлығының “Тыуған яҡ палитраһы” Маҡтау грамотаһы, “Йөрәк менән рәсем яһайым” БР педагогик хеҙмәткәрҙәре конкурсы дипломы, шулай уҡ “Йөн рәсеме” буйынса БР халыҡтарының декоратив-ғәмәли сәнғәт конкурстарында ҡатнашҡан өсөн дипломдар. Бынан тыш, ул уҡыусыларҙың Н.И.Лобачевский исемендәге Бөтә Рәсәй фәнни конференцияһында еңүесе әҙерләгән өсөн диплом алды.

Үҙенең намыҫлы хеҙмәте, үҫеп килеүсе быуынға сәнғәт белеме һәм тәрбиә биреү өлкәһендәге уңыштары, шулай уҡ эшкә ижади ҡарашы өсөн Зөлфиә Фәнис ҡыҙы күп тапҡыр төрлө дәрәжәләге бүләктәргә лайыҡ булды, шул иҫәптән Башҡортостан Республикаһы Мәғариф министрлығының Маҡтау грамотаһы, Рәсәй Федерацияһы Федераль Йыйылышы - Дәүләт Думаһының 1-се дәрәжә дипломы һәм Рәсәй Федерацияһы Мәғариф министрлығының Маҡтау грамотаһы.

Педагогик эшсәнлегенән тыш, ул йәмәғәт тормошонда ла әүҙем ҡатнаша. Тарҡаҙы ауылы ҡатын-ҡыҙҙар советы рәйесе урынбаҫары һәм элегерәк муниципаль район Советы депутаты булған.

2013 йылдың августында Зөлфиә Фәнис ҡыҙы Исламбахты ауылында төп дөйөм белем биреү мәктәбен етәкләй, ул Һигеҙенсе март исемендәге урта дөйөм белем биреү мәктәбенең филиалы булараҡ эшләй. Уның етәкселегендә туғыҙ уҡытыусынан торған мәктәп коллективы берҙәмлек күрһәтә. Етәксе билдәләп үткәнсә, уртаҡ эш – ул уңыш нигеҙе, һәм ваҡыт уларҙың коллективы тап шундай булыуын раҫланы.

2018-2022 йылдарҙа мәктәп тхеквондо секцияһын әүҙем үҫтерҙе, һәм тәрбиәләнеүселәр Ҡазан, Һамар һәм Өфөлә чемпионаттарҙа һәм беренселектәрҙә ҙур уңыштарға иреште. Ҡазахстан чемпионы булған Радмила Ғимаева айырыуса айырылып тора. Мәктәп коллективы уҡыусыларының уңыштары менән ғорурлана, улар юғары һөҙөмтәләр күрһәтә, күп кенә интеллектуаль ярыштарҙа, шул иҫәптән уҡыусыларҙың республика олимпиадаһының муниципаль этабында еңеүселәр була. Балалар биология, математика, рус теле, физика һәм тарих буйынса тирән белемдәрен, башҡа фәндәр буйынса олимпиадаларҙа уңыштарын күрһәтте, Зөлфиә Фәнис ҡыҙы етәкселегендәге педагогик коллективтың юғары әҙерлек дәрәжәһен раҫланы.

Уның ғаиләһенә тәрән тоғролоғон әүҙем һөнәри һәм ижтимағи эшсәнлек менән бергә алап барыу һәләте ҙур хөрмәткә эйә.

Ҙур ғаиләлә -  ул ҙур байлыҡ

Дөрөҫөн әйткәндә, ул бер ҡасан да үҙенең тормошо шундай ҙур ғаилә менән бәйле булыр тип уйламаған, әммә яҙмыш үҙ төҙәтмәләрен индергән. Өс балаһынан тыш, ул тағын ун ике балаға әсәй була, уларҙы опекаға ала. Бигерәк тә ихтирамға лайыҡлы факт: Зөлфиә Фәнис ҡыҙы балаларҙың алтыһын, ауырыу һөҙөмтәһендә ирен юғалтҡандан һуң, ғаиләгә алған.

– Баланы ғаиләгә алыу теләк кенә түгел, ә етди һынауҙарға әҙер булыуҙы талап итә. Шул ваҡытта ғына ҡыйынлыҡтарҙы еңеп була. Беҙ ябай, ләкин мөһим принцип буйынса йәшәйбеҙ: “Мәшәҡәттәрҙе һәм шатлыҡтарҙы тигеҙ бүлеү”, – тип уртаҡлаша ул.

Хәҙер үҙ балалары инде ҙурҙар. Урал 2021 йылда БДУ-ла юриспруденция буйынса бакалавр дипломын алған, ә 2024 йылда РФ Хөкүмәте ҡарамағындағы Финанс университетының Өфө филиалында иҡтисад буйынса магистратураны тамамлаған. Реналь Һамар дәүләт медицина университетында уҡыған, ә Юнир хәҙер Октябрьскийҙағы Роснефть ойошторған 11-се класта уҡый.

Өлкәне Никитаға 22 йәш. Ул инде өс йыл МХО зонаһында хеҙмәт итә, хәрби бурыстар үтәй. Ул яралана, ләкин дауаланудан һуң хеҙмәтенә ҡайта, “Хәрби батырлыҡ” һәм “Батырлыҡ өсөн” миҙалдары менән бүләкләнгән. Азамат менән Сергей Бөгөлмә төҙөлөш-техник колледжын тамамланылар, Азамат ҡала чемпионы булды. Эмиль Боғоруслан нефть колледжын тамамлаған һәм хәҙер армияла хеҙмәт итә, профессор Н.Е. Жуковский исемендәге Хәрби-һауа академияһы менән контракт төҙөгән. Максим шул уҡ колледждың икенсе курсында уҡый. Улар бөтәһе лә тхэквондо менән шөғөлләнгән һәм ярыштарҙа уңыштарға ирешкән.

Өйҙә бәләкәйҙәре: Елизавета, Тимур, Рамина, Глеб, Наташа, Павел. Улар мәктәп сараларында әүҙем ҡатнаша, төрлө өлкәләрҙә үҙ һәләттәрен күрһәтә һәм яңы ҡаҙаныштарға ынтыла. Уларҙың һәр ҡайһыһы үҙ мауығыуын таба: кемдер бокс менән шөғөлләнә, кемдер бейей, ә кемдер рәсем һәм ҡул эштәре менән мауыға. Әсәләре уларҙың уңыштары менән ғорурлана һәм гел генә ярҙам итергә тырыша. Уның өсөн һәр бала - кәрәкле һәм ҡәҙерле.

– Беҙҙең ҙур ғаиләлә спортсылар һәм отличниктар ғына түгел, үҙҙәренең уникаль мөмкинлектәре һәм юлы булған “үҙенсәлекле” балалар ҙа бар. Өс баланың сәләмәтлегенә ҡағылышлы сикләүҙәре бар, һәм беҙ улар үҫеш алһын һәм үҙ потенциалын тормошҡа ашырһын өсөн уңайлы шарттар тыуҙырырға тырышабыҙ. Закон буйынса, 18 йәшендә һәр йәш кеше тулы хоҡуҡлы кешегә әүерелә һәм үҙ аллы тормошҡа аяҡ баҫа. Беләм, был минең тәрбиәмдәге йәтим балаларҙы ла көтә. Шуға күрә уларҙы ныҡ булырға, ҡыйынлыҡтарҙан ҡурҡмаҫҡа өйрәтергә тырышам. Әлбиттә, төрлө хәлдәр була – кемдер башта ярҙамға өмөтләнә, әммә тормош барыһын да үҙ урынына ҡуя, һәм яйлап барыһы ла үҙең булдыра алыуҙың мөһимлеген аңлай, – тип һөйләй Зөлфиә  Фәнис ҡыҙы.

Улар йыш ҡына ғаилә кисәләре үткәрә, унда уңыштар һәм уңышһыҙлыҡтар тураһында фекер алыша, киләсәккә пландары менән уртаҡлаша. Был берҙәм команда булып ҡалырға ярҙам итә, унда һәр кем ярҙам һәм хәстәрлек тоя.

 – Улар белә: иң мөһиме уларға мин генә түгел, ағай-апайҙары ла ярҙам итәсәк. Мин уларҙы бер-береһен хөрмәт итергә, үҙ фекерҙәре һәм хистәре менән уртаҡлашырға өйрәтәм, – тип билдәләй әсәләре.

Зөлфиә Фәнис ҡыҙының төп маҡсаты балаларға изгелек эшләү, уларҙың тормошон еңеләйтеү. Ул уҡытыусы һәм етәксе генә түгел, ә ысын оҫтаз һәм балаларға өлгө. Уның ижад һәм хәстәрлек менән тулы тормошо, ысынлап та, йәшәү рәүешенә әүерелде. Матурлыҡҡа ынтылып, матурлыҡ тыуҙырып йәшәүсе Зөлфиә  Фәнис ҡыҙы ысын мәғәнәһендә бәхетле кеше.

Фото ғаилә архивынан.