Туймазы районында яңы хакимиәт башлығы тәғәйенләнде

Депутаттар контракт буйынса район хакимиәте башлығын билдәләү мәсьәләһен ҡараны һәм был вазифаға бер тауыштан 41 йәшлек Булат Мусинды һайланы

41 йәшлек Булат Мирзалиф улы сығышы менән Башҡортостандың Илеш районынан. Башҡорт дәүләт аграр университетын, Һамар дәүләт иҡтисад университетын тамамлаған. Германияла стажировка үткән. Иҡтисад фәндәре кандидаты.

Өфөнөң ер ресурстары һәм ер төҙөлөшө буйынса комитетында, Башҡортостан буйынса Роснедвижимость идаралығында һәм Башҡортостандың ер һәм мөлкәт мөнәсәбәттәре министрлығында, «ЛУКОЙЛ-Уралнефтепродукт» йәмғиәтендә эшләй, 2021 йылдың февралендә уны Башҡортостан Республикаһы сәнәғәт, энергетика һәм инновациялар Министрлығының йыйылма-аналитика эше бүлеге начальнигы итеп тәғәйенләйҙәр.

2022 йылдың апреленән Өфө машиналар эшләү колледжын етәкләй.

Башҡортостан Республикаһында сәнәғәт үҫешенә индергән шәхси өлөшө, эштә өлгәшкән уңыштары, юғары профессиональ оҫталығы өсөн Булат Мирзалиф улы Башҡортостандың сәнәғәт, энергетика һәм инновациялар Министрлығының һәм Башҡортостандың сауҙа-сәнәғәт палатаһы Союзының Почет грамоталары менән бүләкләнде.

Өйләнгән, дүрт балаһы бар.