Йәштәр форумынан Еңеү менән

«Хеҙмәттәштәр» Беренсе йәштәр форумы Өфө ҡалаһының Профсоюздар йортонда уҙҙы. Йәш табиптар медицина ойошмалары эшенең һөҙөмтәлелеген күтәреүгә йүнәлдерелгән идеялары һәм проекттары менән уртаҡлаша алды.

 Форумда баш һүҙ менән сығыш яһаған Башҡортостан Республикаһы Һаулыҡ һаҡлау министрлығының дәүләт граждандар хеҙмәте һәм кадрҙар идараһы етәксеһе Гөлнара Камалова республика һаулыҡ һаҡлау тармағында эшләүсе хеҙмәткәрҙәрҙең 20 проценттан артығы — йәш белгестәр, тип билдәләне. Был форумдың маҡсаты — аралашыу, дуҫлыҡ һәм яңы идеялар тыуҙырыу өсөн республиканың иң креатив, прогрессив табиптарын берләштереү. Октябрьскийҙың 1-се ҡала дауаханаһынан табип-хирург Ренат Шәрәфетдинов, табип-рентгенолог Елена Румянцева, табип-ортопед-травматолог Владимир Матвеев, Туймазы үҙәк район дауаханаһының участок табип-педиатры Илмира Юсаева, участок табип-терапевы, Приют район дауаханаһы өсөн яуаплы табип Дарина Тарасова кеүек инициативалы йәш табиптарҙан торған командаһының «АМС» (Йәш белгестәр ассоциацияһы) исемле проекты еңеү яуланы. Проект координаторы — менеджер Наталья Спирина.

Йәш табиптар идеяны тормошҡа ашырыу өсөн ярҙам алырға өмөтләнә. Белгестәр әйтеүенсә, форум алға ынтылырға рухландырған.

— Ҡала дауаханаһының 1-се стационарының компьютер томографияһы кабинетындағы ҡабул итеү бүлмәһендә бер йыл эшләйем. Октябрьскийға ҡайтыу һәм бында эшкә урынлашыуының иң төп мотивацияһы — бында алырға мөмкин булған ҙур тәжрибә. Беҙҙең коллектив бик шәп, йәш хеҙмәттәштәребеҙ күп. 1-се ҡала дауаханаһына килеүемә тамсы ла үкенмәйем, — тине табип.

Елена Румянцева Ҡазан федераль университетының Фундаменталь медицина һәм биология институтын тамамлаған. Һуңынан рентгенолог белгеслегенә ординатураға уҡырға ингән. Ләкин табип Ҡазанда ҡалмаҫҡа, Башҡортостанға күсергә ҡарар ҡылған.

— Октябрьский — бик уңайлы ҡала. Бында барыһы ла ҡул һуҙымы арала урынлашҡан. Ҙур ҡалала йәшәгәндә, тормоштоң нисек уҙғанын һиҙмәйһең. Дуҫтар менән осрашыуҙарҙы алдан планлаштырырға кәрәк, эшкә юл көн һайын күп ваҡытты ала, — тине ул.

МИАЦ ГКУЗ директоры урынбаҫары Елена Белозерова фекеренсә, был аҡса сығармайынса кадрҙар сәйәсәтен яҡшыртыу буйынса әҙер проект. Команда проектты Октябрьский ҡалаһында ғына түгел, округтың башҡа дауаханаларында ла тормошҡа ашыра аласаҡ, тип ышана белгес.

— Бөгөн беҙ республика медиктарының ни тиклем актив, маҡсатлы һәм креатив булыуын күрҙек. Был талантлы белгестәр үҙ идеяларын тормошҡа ашыра аласағына шик юҡ, профсоюз иһә йәштәр советтары инициативаларын хуплаясаҡ. Йәш табиптарҙың бөгөнгө көндә алған белемдәре һәм бәйләнештәре уларҙың киләсәк һөнәри үҫеше өсөн көслө нигеҙ буласаҡ, — тип билдәләп үтте һаулыҡ һаҡлау хеҙмәткәрҙәренең республика профсоюзы рәйесе Рауил Хәлфин.