+20 °С
Облачно
Общество
10 Февраля 2020, 08:00
“Ҡатын-ҡыҙ – милләт әсәһе”
“Башҡорт ҡатын-ҡыҙҙары йәмғиәте” төбәк йәмәғәт ойошмаһы тарафынан булдырылған был сарала бик күп гүзәл зат ҡатнашырға һәм еңергә лә өлгөрҙө
Ошо көндәрҙә конкурстың тәүге этабы тамамланды, йәғни муниципалитеттарҙан республика кимәлендә ярышыу өсөн ғаризалар 1 февралгә тиклем ҡабул ителде.
Проект авторы, ойошма рәйесе, БР Дәүләт Йыйылышы – Ҡоролтай депутаты Гөлнур Ҡолһарина ҡатын-ҡыҙҙарҙың бөгөнгө йәмғиәттәге роленең ҙур булыуын һәр саҡ әйтеп килә. Был сираттағы, дүртенсе конкурста ла, һәр ваҡыттағыса, әүҙем һәм заман менән бергә атларға тырышҡан апай-һеңлеләр ҡатнашырға теләк белдерҙе. Ойоштороу комитетына 500-ҙән ашыу (былтыр 300 ине) ғариза килгән, тип хәбәр итә «Йәшлек» гәзите..
Конкурста ун номинация ҡаралған. Улар: «Ҡатын-ҡыҙ – әсә», «Ҡатын-ҡыҙ – лидер», «Ҡатын-ҡыҙ – ғалимә», «Ҡатын-ҡыҙ – уҡытыусы», «Ҡатын-ҡыҙ — бизнес-леди», «Ҡатын-ҡыҙ — һөнәр оҫтаһы», «Ҡатын-ҡыҙ — йыл өлгөһө», «Өлкән йәштәге әүҙем йәмәғәт эшмәкәре», «Иң йәш йәмәғәт эшмәкәре», «Мәҙәниәттә ҡатын-ҡыҙ».
Финал 4 мартта “Торатау” Конгресс-холында үтәсәк. Күргәҙмә, мәҙәни программа, ике майҙанда бүләкләү тантанаһы, Рабиға Ҡушаева исемендәге миҙалдарҙы тапшырыу, иҫтә ҡалырлыҡ осрашыуҙар уҙасаҡ.
Быйылғы конкурс Республика башлығының ижтимағи-йәмәғәт ойошмалары өсөн Грантына лайыҡ булды.
Алһыу Ишемғолова
