Ҡатнашайыҡ, аралашайыҡ, дуҫтар!

«Сатыртау – Татарстандың иң юғары географик нөктәһе – 343 метр. Сатыртау түбәһенән шундай матурлыҡ асыла, хатта тын ҡыҫыла. Элек-электән кешеләр күңел тыныслығына һәм ялына килтергән был урындың ыңғай энергетикаһын билдәләгән, – ти төбәк Башҡорттарының милли-мәҙәни автономияһы идараһы рәйесе Ғәли Хәсәнов. – Фестивалдә башҡорт тирмәләрен ҡорҙоҡ, йолаларҙы күрһәттек, башҡа төрки халыҡтарҙан айырылып торған көнкүрешебеҙ, мәҙәниәтебеҙ менән таныштырҙыҡ».

Борон-борондан аҡһаҡалдар Сатыртауҙа йыйынға йыйылған, мөһим һорауҙарҙы хәл иткән, ә урындағы халыҡ боронғо йолалар буйынса байрамдар уҙғарған. Театрлаштырылған тамашала Сатыр батыр төп персонаж булып сығыш яһаған.

2011 йылдан уҙғарылған фестивалдә өс меңләп кеше ҡатнашҡан. Уның төп маҡсаты – төрки халыҡтарының мәҙәни хеҙмәттәшлеген, мәҙәни йолаларҙы, рухи байлыҡты тергеҙеү һәм үҫтереү, халыҡтарҙың бер-береһен аңлау һәм берләшеүен нығытыу.

Был йыйында, Аҙнаҡай тыуған яҡты өйрәнеү музейы хеҙмәткәрҙәренең саҡырыуы буйынса, “Тамға” ижад берекмәһе етәксеһе Зөлфиә Краснова үҙенең ҡул эштәре күргәҙмәһен тәҡдим итте. Ул Башҡортостандың төньяҡ-көнбайышы башҡорттарына хас булған милли кейем өлгөләрен дә күрһәтте. Шулай уҡ Зөлфиәнең махсус әҙерләп алып барған, татар орнаменты – сағыу сәскәләр төшөрөп эшләнгән визитницалары халыҡҡа бик оҡшаған.

– Ошондай йыйындарға, күргәҙмә-конкурстарға йөрөү күңел тыныс-лығы бирә, дәрт-дарман өҫтәй. Киләсәккә яңы пландар, идеялар менән ҡайтаһың, дуҫтар табаһың. Ижади эш менән шөғөлләнеү һәм төрлө сараларҙа ҡатнашыу, минеңсә, бөгөнгөнө үткәндәр менән бәйләй, булған күперҙе нығыта, – ти Зөлфиә тәьҫораттары менән уртаҡлашып.

Ысынлап та, боронғолар ятҡан таш мүкләнгән, тигән. Килтереп биргән-де көтөп, һауаға төкөрөп ятһаң, ашың да аш булмай, эшең дә ырамай. Ошондай сараларға йөрөйөк, ҡатнашайыҡ, аралашайыҡ, дуҫтар!