+21 °С
Ясно
Новости
6 Марта 2022, 07:40
Тимурсылар эшләй
Аркадий Гайдарҙың "Тимур һәм уның командаһы" тигән әҫәре күптәргә таныштыр, моғайын. Әҫәрҙәге балалар ҡыҙыл армия хеҙмәткәрҙәре ғаиләләренә һәм ҡарт-ҡороға ярҙам итә. Әҫәр баҫылып сыҡҡас, СССР-ҙың пионер ойошмаларының барыһы ла тиерлек был идеяны күтәреп сыға һәм “Тимурсылар" исеме аҫтында пионерия йәмәғәт ойошмаһы барлыҡҡа килә. Ысынлап та, файҙалы эш менән шөғөлләнә был ойошма.
Уның активистары ҡарттарға ярҙам итә, йәмәғәт урындарында тәртип урынлаштырыу менән шөғөлләнә, синыфтар араһында ойошторолған спорт ярыштарында, төрлө олимпиадаларҙа ҡатнаша, художество күргәҙмәһе ойоштора. Тимер-томор һәм макулатура йыялар. Балалар өсөн был ниндәйҙер кимәлдә ярыш булһа, өлкәндәр өсөн был тәрбиә эшендә бер мөһим аҙым булған.
Әлбиттә, бөгөн пионерҙар ойош-маһы тарих төпкөлөндә ҡалды. Әммә “Тимурсылар” эше онотолмаған. Бүздәк районында был хәрәкәт әле лә эшләп килә. Ҡыш айҙарында ҡарлы-буранлы мәлдәрҙә мәктәп уҡыусылары оло йәштәге әбей-бабайҙарға ярҙамға ашыға. Ихаталарын, өй түбәләрен ҡарҙан таҙарталар. Шулай уҡ Бөйөк Ватан һуғышында ҡатнашыусылар иҫтәлегенә төҙөлгән һәйкәл, обелиск буйҙарын, Еңеү парк-тарын тәрбиәләйҙәр. Көҙөн, иһә, ағастарҙың ҡойолған япраҡтарын
йыялар. Был эштәре өсөн уларға “Афарин!” тиергә генә ҡала.
