“Йыл уҡытыусыһы – 2020” республика конкурсы старт ала!

Әле яңы ғына районда был конкурс шаулап-гөрләп үтеп киткәйне, хәҙер инде республика кимәленә лә юл тоторға ваҡыт етә. Мөғәллимдәр таныш булмаған мәктәптә асыҡ дәрестәр күрһәтте, класс сәғәттәре үткәрҙе, проблемалы тема күтәреп проект яҡланы, асыҡ лекция менән сығыш яһаны. Уларҙың ошондай тығыҙ ҙа, сәмле лә ярышын уҡыусыларҙан торған жюри баһаланы. Башҡорт теле уҡытыусыларының быйылғы йыл бәйгеһе иҫтәлекле – 25 йыллыҡ юбилейын билдәләйәсәк.

Үткән йылдарҙағы конкурс менән сағыштырғанда, быйыл бер аҙ үҙгәрештәр ҙә бар. Мәҫәлән, башҡорт теленән быға тиклем эссе яҙһалар, быйыл һәр төбәк башҡорттарының милли кейемен презентациялау, кластан тыш эшмәкәрлек, проблемалы тема күтәрелгән шәхси лекция кеүектәре индерелгән.

Һуңғы йылдарҙа республика кимәленә сыҡҡан уҡытыусыларыбыҙ үҙҙәренең тәжрибәләре менән уртаҡлашып, призлы урындарға лайыҡ булып, хатта лауреат исемен дә алып ҡайта. Был, һис шикһеҙ, Туймазы ерендә үҙ эшен яратҡан, балаларҙы хөрмәт иткән, уларҙы шәхес итеп тәрбиәләүҙә күп көс һалған мөғәллимдәр эшләүен раҫлай. Быйылғы һөнәри ярышта ла уҡытыусыларыбыҙҙың ярыш сәмен һүрелтмәй, рухи көс менән ҡеүәттә лайыҡлы урын алыуҙарын теләйбеҙ! Яҡташтарығыҙ һеҙҙең менән!