Беҙҙең күңелдәрҙә йәшәргә лә әле йәшәргә

Ошо юбилей датаһы алдынан Әкрәм Сөнәғәт улының тыуған төйәгендә Ермөхәмәт ауылының урындағы мәҙәниәт йортонда «Йырлы ғүмер» хәтер кисәһе үтте.

Композиторҙың ҡәбер ташында алтын хәрефтәр менән уның васыят кеүек яңғыраған һүҙҙәре уйып яҙылған: "Кешеләр! Мин һеҙгә 700 йыр ҡалдырҙым. Уларҙы онотмағыҙ!». Яҡташтары уларҙы онотмай. Әкрәм Дауытовтың әҫәрҙәрен әле лә Башҡортостандың һәм Татарстандың күп кенә профессиональ башҡарыусылары үҙ репертуарына индерә.

Йыл һайын Туймазы районында шағир-йырсы хөрмәтенә иҫтәлекле саралар үткәрелә, унда уның әҫәрҙәре яңғырай. Юбилей кисәһендә Әкрәм Дауытовтың иң яҡшы йырҙарын Туймазы районы һәм Октябрьский ҡалаһы художество үҙешмәкәрлегендә ҡатнашыусылар башҡарҙы. Фронтовик һәм билдәле шағирҙы иҫкә алыу байрамында уның ҡыҙҙары Заира Шәрипова һәм Айля Рощина, ейәнсәре Лилиә, ейәне Ролан ҡатнашты. Ҡыҙҙары атаһы тураһында хәтирәләре менән уртаҡлашты.

Ҡандра ауыл советы хакимиәте башлығы Рил Рафиҡов һәм ауыл-ара клуб системаһы директоры Гөлнар Сабирова шағирҙың милли мәҙәни мираҫҡа индергән өлөшө хаҡында һөйләне. Композиторҙың биографияһының фронт осорона айырыуса иғтибар бүленә, ул ғүмеренең байтаҡ өлөшөн хәрби эштәргә бағышлай. Бөйөк Ватан һуғышы башланғанда ул Одессала хеҙмәт итә. Өлкән лейтенант Әкрәм Дауытов окоптарҙа һәм блиндаждарҙа бик күп йырҙар яҙа. Иң ауыр ваҡытта полкташтарына гармунда уйнауы һәм йырҙары менән ярҙам итә. Әкрәм Сөнәғәт улы тыуған яғына яңы йырҙар ижад итеү, балаларҙы музыкаға өйрәтеү теләге менән ҡайта. Әкрәм Дауытов Ҡандра ауылының 2-се мәктәбендә музыка уҡытыусыһы булып эшләй, ул бөгөн уның исемен йөрөтә.